ഗോവയിൽ 25 പേരുടെ മരണത്തിനിടയാക്കിയ തീപിടിത്തമുണ്ടായ 'ബിർച്ച് ബൈ റോമിയോ ലെയ്ൻ' നൈറ്റ് ക്ലബ്ബിൻ്റെ നാല് സഹ ഉടമകളിൽ ഒരാളായ അജയ് ഗുപ്തയെ ഗോവ പോലീസ് കസ്റ്റഡിയിലെടുത്തു. ദുരന്തം നടന്നതിന് ശേഷം ഒളിവിലായിരുന്ന ഗുപ്തയെ ലുക്ക്-ഔട്ട് സർക്കുലർ പുറപ്പെടുവിച്ചതിനെ തുടർന്ന് ഡൽഹിയിൽ നിന്നാണ് കസ്റ്റഡിയിലെടുത്തത്.
"നൈറ്റ് ക്ലബ് ഉടമകളിൽ ഒരാളായ അജയ് ഗുപ്തയെ ഞങ്ങൾ കസ്റ്റഡിയിലെടുത്തിട്ടുണ്ട്. കേസിൽ പിടിയിലാകുന്ന ആറാമത്തെ വ്യക്തിയാണ് അദ്ദേഹം," ഗോവ പോലീസ് വക്താവ് ചൊവ്വാഴ്ച രാത്രി വാർത്താ ഏജൻസിയായ പിടിഐയോട് പറഞ്ഞു.
പോലീസ് സംഘം ഡൽഹിയിലെ വസതിയിൽ കണ്ടെത്താൻ കഴിയാതെ വന്നതിനെ തുടർന്നാണ് ഇയാൾക്കെതിരെ ലുക്ക്-ഔട്ട് സർക്കുലർ പുറപ്പെടുവിച്ചത്. ഗോവയിലേക്ക് കൊണ്ടുവരുന്നതിനുള്ള നടപടിക്രമങ്ങൾ പൂർത്തിയാക്കിയ ശേഷം ഗുപ്തയുടെ അറസ്റ്റ് ഔദ്യോഗികമായി രേഖപ്പെടുത്തുമെന്നും വക്താവ് കൂട്ടിച്ചേർത്തു.
