ഡൽഹി നഗരത്തിലെ വിവിധ സിവിക് നിയമലംഘനങ്ങൾക്കുള്ള പിഴത്തുക വർദ്ധിപ്പിക്കാൻ ലക്ഷ്യമിട്ടുള്ള പുതിയ ബിൽ പാർലമെന്റിൽ അവതരിപ്പിച്ചു. വാണിജ്യ വ്യവസായ സഹമന്ത്രി ജിതിൻ പ്രസാദ ലോക്സഭയിൽ അവതരിപ്പിച്ച ജൻ വിശ്വാസ് ബിൽ 2026 പ്രകാരം 1957-ലെ ഡൽഹി മുനിസിപ്പൽ കോർപ്പറേഷൻ ആക്ടിലാണ് മാറ്റങ്ങൾ വരുന്നത്. പുതിയ നിർദ്ദേശപ്രകാരം പൊതുനിരത്തിൽ നായ്ക്കളെ ചങ്ങലയിടാതെ നടത്തുന്നവർക്കുള്ള പിഴ 50 രൂപയിൽ നിന്ന് 1000 രൂപയായി ഉയരും. സമാനമായി പൊതുറോഡുകളിൽ കന്നുകാലികളെ കെട്ടിയിടുന്നവർക്കുള്ള പിഴയും നിലവിലുള്ള 100 രൂപയിൽ നിന്ന് 1000 രൂപയാക്കി വർദ്ധിപ്പിച്ചിട്ടുണ്ട്.
ശുചിത്വ പരിപാലനവുമായി ബന്ധപ്പെട്ട നിയമങ്ങളിലും കർശനമായ പിഴകളാണ് ബിൽ ശുപാർശ ചെയ്യുന്നത്. തെരുവുകളിലേക്ക് മലിനജലം ഒഴുക്കുന്നതിനും മാലിന്യം തള്ളുന്നതിനുമുള്ള പിഴ 50 രൂപയിൽ നിന്ന് 200 രൂപയാക്കി. വീടുകളിൽ നിന്ന് മാലിന്യശേഖരണത്തിന് ആവശ്യമായ സൗകര്യങ്ങൾ ഒരുക്കാത്തവർക്ക് 500 രൂപ പിഴ നൽകേണ്ടി വരും. അപകടാവസ്ഥയിലുള്ള കെട്ടിടങ്ങളിൽ നിന്ന് മാറാൻ അധികൃതർ ആവശ്യപ്പെട്ടിട്ടും അത് പാലിക്കാത്തവർക്കും, പൂർത്തീകരണ സർട്ടിഫിക്കറ്റ് ഇല്ലാതെ കെട്ടിടം കൈവശം വെക്കുന്നവർക്കും 1000 രൂപ വീതമാണ് പുതിയ പിഴ നിരക്ക്. വീട്ടുനമ്പറുകൾ നശിപ്പിക്കുകയോ മാറ്റുകയോ ചെയ്താൽ 1000 രൂപയും, പൊതുജനങ്ങൾക്ക് അപകടകരമാം വിധം പടക്കം പൊട്ടിച്ചാലോ ഉദ്യോഗസ്ഥരുടെ ജോലി തടസ്സപ്പെടുത്തിയാലോ 500 രൂപയും പിഴയായി നൽകണം.
