ഫോൺ സ്വിച്ച് ഓഫ് ആവുകകൂടി ചെയ്തതോടെ വീട്ടുകാർ പോലീസിൽ പരാതി നൽകുകയായിരുന്നു. തിരോധാനത്തിന് കേസെടുത്ത് പോലീസ് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. പാങ്ങപ്പാറയിൽനിന്ന് ഇന്ന് വൈകുന്നേരത്തോടെ, ചാക്കിലാക്കി മരത്തിൽ കെട്ടിത്തൂക്കിയ നിലയിലാണ് അഭിറാമിന്റെ മൃതദേഹം കണ്ടെത്തിയത്.ഇൻക്വസ്റ്റ് നടപടികൾ പുരോഗമിക്കുകയാണ്. നിലവിൽ ലഭിച്ചിട്ടുള്ള വിവരങ്ങളുടെ അടിസ്ഥാനത്തിൽ പോലീസ് പറയുന്നതിങ്ങനെ; ഇന്നലെ വൈകുന്നേരത്തോടെ ഒരു പെൺകുട്ടിയുടെ ഇൻസ്റ്റഗ്രാം അക്കൗണ്ടിൽനിന്നും അഭിറാമിന് ഒരു മെസേജ് വന്നിരുന്നു. ഇതിനുപിന്നാലെയാണ് അയാൾ വീട്ടിൽനിന്നും ഇറങ്ങിയത്.

പെൺകുട്ടിയെ ഉപയോഗിച്ച് ഇയാളെ പാങ്ങപ്പാറയിലേക്ക് വിളിച്ചുവരുത്തുകയായിരുന്നു എന്നാണ് പോലീസിന്റെ നിഗമനം. ഇവിടെയെത്തിയ ചെറുപ്പക്കാരനെ പ്രതി കൊലപ്പെടുത്തുകയായിരുന്നു. പ്രതിയായ 17-കാരനും ഒരു പെൺകുട്ടിയും തമ്മിൽ ഇഷ്ടത്തിലായിരുന്നു. കൊല്ലപ്പെട്ട അഭിറാമിനും ഇതേ പെൺകുട്ടിയുമായി സൗഹൃദം സ്ഥാപിക്കണമെന്നുണ്ടായിരുന്നു.ഇതിന്റെ ഭാഗമായി നടന്ന തർക്കമാണ് കൊലപാതകത്തിലേക്ക് നയിച്ചത് എന്നാണ് പോലീസിന് ലഭിച്ചിട്ടുള്ള വിവരം. കൊല്ലപ്പെട്ടയാളും കൊലനടത്തിയയാളും 17-വയസുള്ള ചെറുപ്പക്കാരാണ് എന്നതാണ് ഈ കേസിൻ്റെ ഞെട്ടിക്കുന്ന പ്രത്യേകത. കൊല നടത്തിയ ചെറുപ്പക്കാൻ പ്ലസ്സു പഠിക്കേണ്ട പ്രായക്കാരനാണെങ്കിലും അയാൾ പഠനം തുടർന്നിരുന്നില്ല എന്നാണ് വിവരം.

മാത്രമല്ല, ഇയാൾ മോഷണമടക്കമുള്ള പല കേസുകളിലും മുമ്പ് പ്രതിയായിട്ടുള്ള ആളാണെന്നും വിവരമുണ്ട്. ഇയാൾ ഒറ്റയ്ക്കാണോ കൃത്യം നടത്തിയത് എന്നതും സംശയമാണ്. 17-കാരന് ഒറ്റയ്ക്ക് ഒരാളെ കൊലപ്പെടുത്തി ചാക്കിലാക്കി മരത്തിൽ കെട്ടിത്തൂക്കാൻ കഴിയുമോ എന്നും അതിന്റെ സാധ്യത എത്രത്തോളമുണ്ടെന്നും പോലീസ് അന്വേഷിക്കുന്നുണ്ട്. പോലീസിന് ചിലരെ സംശയമുള്ളതായും വിവരമുണ്ട്.

അഭിറാമിന്റെ കൂട്ടുകാരെ പോലീസ് ഇന്നലെ തന്നെ ചോദ്യംചെയ്തിരുന്നുവെങ്കിലും കാര്യമായ വിവരങ്ങളൊന്നും ലഭിച്ചിരുന്നില്ല. പിന്നീട് സിസിടിവി ദൃശ്യങ്ങളും മൊബൈൽ ടവർ കേന്ദ്രീകരിച്ചുള്ള അന്വേഷണത്തിനും ശേഷമാണ് അഭിറാമിൻ്റെ മൃതദേഹം കണ്ടെത്തിയത്. കമ്മീഷണറുടെ നേതൃത്വത്തിലുള്ള സംഘം സ്ഥലത്തെത്തി പരിശോധനകൾ നടത്തിവരികയാണ്. സ്റ്റേഷനിൽ പ്രതിയുടെ ചോദ്യംചെയ്യൽ പുരോഗമിക്കുകയാണ്.