മനുഷ്യനിർമിതമായ ആഗോളതാപനത്തിന് പുറമെ എൽ നിനോ കൂടി എത്തുന്നതോടെ അന്തരീക്ഷ താപനില റെക്കോർഡ് നിലവാരത്തിലേക്ക് ഉയരും. മഴയുടെ രീതികളിൽ വൻതോതിലുള്ള വ്യതിയാനമുണ്ടാകുമെന്നും വിവിധ ഭൂഖണ്ഡങ്ങളിൽ അതിരൂക്ഷമായ വരൾച്ചയ്ക്കും മിന്നൽ പ്രളയങ്ങൾക്കും ഇത് കാരണമാകുമെന്നും ഏജൻസി വ്യക്തമാക്കുന്നു.

മധ്യ-കിഴക്കൻ ഭൂമധ്യരേഖാ പസഫിക് സമുദ്രത്തിലെ ഉപരിതല താപനില സാധാരണയിലും വളരെ ഉയരുന്ന പ്രതിഭാസമാണ് എൽ നിനോ. ഇത് ആഗോള കാറ്റിന്റെ ഗതിയെയും മർദ്ദത്തെയും മഴയുടെ വിതരണത്തെയും അടിമുടി മാറ്റിമറിക്കും.

സാധാരണയായി നവംബർ-ഫെബ്രുവരി മാസങ്ങളിൽ എൽ നിനോ അതിന്റെ ഉച്ചസ്ഥായിയിലെത്തുമെങ്കിലും, ആഗോള അന്തരീക്ഷത്തിൽ അതിന്റെ പ്രത്യാഘാതമായി താപനില കുതിച്ചുയരുന്നത് അതിനുശേഷമുള്ള മാസങ്ങളിലാണ്. നിലവിൽ തന്നെ മധ്യ അമേരിക്ക ഉൾപ്പെടെയുള്ള പ്രദേശങ്ങളിൽ എൽ നിനോ രൂക്ഷമായ നാശനഷ്ടങ്ങൾ വിതച്ചുതുടങ്ങിയിട്ടുണ്ട്; പലയിടങ്ങളിലും കൊടും വരൾച്ചയെത്തുടർന്ന് കന്നുകാലികളും കൃഷിയും കൂട്ടത്തോടെ നശിക്കുന്നതായാണ് റിപ്പോർട്ടുകൾ.