യുണൈറ്റഡ് അറബ് എമിറേറ്റ്സ് (യുഎഇ) തങ്ങളുടെ ചരിത്രത്തിലെ ആദ്യത്തെ പാസഞ്ചർ ട്രെയിൻ സർവീസ് ജൂൺ 30-ന് ആരംഭിക്കാൻ ഒരുങ്ങുകയാണ്. ആദ്യ ഘട്ടത്തിൽ അബുദാബിക്കും ഫുജൈറയ്ക്കും ഇടയിലാണ് ട്രെയിൻ സർവീസ് നടത്തുക. എത്തിഹാദ് റെയിൽ വ്യക്തമാക്കുന്നതനുസരിച്ച്, ഈ രണ്ട് നഗരങ്ങൾക്കിടയിലുള്ള യാത്രാസമയം വെറും ഒരു മണിക്കൂറും 45 മിനിറ്റും (105 മിനിറ്റ്) മാത്രമായിരിക്കും. ഇത് യാത്രാസൗകര്യങ്ങളിൽ വലിയൊരു വിപ്ലവം തന്നെ സൃഷ്ടിക്കുമെന്നാണ് പ്രതീക്ഷിക്കുന്നത്. അബുദാബിയിൽ നിന്നും ഫുജൈറയിലേക്കുള്ള എത്തിഹാദ് റെയിൽ സർവീസിന്റെ ആദ്യത്തെ രണ്ട് ദിവസത്തേക്കുള്ള ടിക്കറ്റുകൾ, ബുക്കിംഗ് ആരംഭിച്ച് 24 മണിക്കൂറിനുള്ളിൽ തന്നെ ഭൂരിഭാഗവും വിറ്റുതീർന്നിരുന്നു.
അബുദാബി കിരീടാവകാശിയും അബുദാബി എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനാണ്, അബുദാബിയെയും ഫുജൈറയെയും ബന്ധിപ്പിക്കുന്ന ഈ പാസഞ്ചർ റെയിൽ ശൃംഖലയിലെ പ്രധാന ഹബ്ബായ 'മുഹമ്മദ് ബിൻ സായിദ് സിറ്റി സ്റ്റേഷൻ' ഉദ്ഘാടനം ചെയ്തു.ദുബായ് ട്രെയിൻ സ്റ്റേഷനും അൽ ദൈദ് ട്രെയിൻ സ്റ്റേഷനും 2026 സെപ്റ്റംബർ 30ന് തുറക്കും, തുടർന്ന് 2026 ഡിസംബർ 30ന് അൽ ദഫ്ര മേഖലയിലെ സ്റ്റേഷനുകൾ ഉദ്ഘാടനം ചെയ്യും. 2027 മാർച്ച് 30ന് ഷാർജ ട്രെയിൻ സ്റ്റേഷൻ തുറക്കുന്നതോടെ പാസഞ്ചർ റെയിൽ ശൃംഖല പൂർണ്ണമായും പൂർത്തിയാകും, രാജ്യത്തെ 11 നഗരങ്ങളിലും പ്രദേശങ്ങളിലുമായി മുഴുവൻ ശൃംഖലയെയും ബന്ധിപ്പിക്കും.
മണിക്കൂറിൽ 200 കിലോമീറ്റർ വേഗതയിൽ സഞ്ചരിക്കുന്ന ഈ ട്രെയിനുകളിലെ സ്റ്റേഷനുകളിൽ കഫേകൾ, റെസ്റ്റോറന്റുകൾ, അന്താരാഷ്ട്ര ബ്രാൻഡുകളുടെ റീട്ടെയിൽ ഔട്ട്ലെറ്റുകൾ എന്നിവ ഉണ്ടായിരിക്കും. ട്രെയിനിനുള്ളിലും ഡൈനിംഗ് സൗകര്യങ്ങൾ ലഭ്യമാണ്. 400 യാത്രക്കാരെ വരെ ഉൾക്കൊള്ളാൻ ശേഷിയുള്ള 13 ട്രെയിനുകളാണ് ഈ പാസഞ്ചർ റെയിൽ ഫ്ലീറ്റിൽ ഉള്ളത്.
യാത്രക്കാർക്ക് എത്തിഹാദ് റെയിലിന്റെ മൊബൈൽ ആപ്ലിക്കേഷൻ വഴിയോ ഔദ്യോഗിക വെബ്സൈറ്റ് വഴിയോ ടിക്കറ്റുകൾ ബുക്ക് ചെയ്യാം. ദിവസേന മൂന്ന് സർവീസുകളാണ് ഈ റൂട്ടിൽ ഉണ്ടാകുക, രാവിലെ 8:19, ഉച്ചയ്ക്ക് 1:53, വൈകുന്നേരം 6:39ന്. ജൂൺ 23 മുതൽ ടിക്കറ്റ് ബുക്കിംഗ് ആരംഭിച്ചിരുന്നു.
ടിക്കറ്റ് നിരക്കുകൾ
കംഫർട്ട് ക്ലാസ് : 55 ദിർഹം മുതൽ
പ്രീമിയം ക്ലാസ് : 120 ദിർഹം മുതൽ
