നാരങ്ങ ചതയ്ക്കുന്ന ചടങ്ങിനിടെ ആക്സിലേറ്റർ അബദ്ധത്തിൽ അമർത്തിയതിനെ തുടർന്ന് കിഴക്കൻ ഡൽഹിയിലെ പ്രീത് വിഹാറിലെ ഷോറൂമിന്റെ ഒന്നാം നിലയിൽ നിന്ന് മഹീന്ദ്ര ഥാർ താഴേക്ക് വീണു. തിങ്കളാഴ്ച വൈകുന്നേരമാണ് സംഭവം നടന്നതെന്ന് പോലീസ് അറിയിച്ചു.
വൈകുന്നേരം അഞ്ച് മണിയോടെ ഗാസിയാബാദിലെ ഇന്ദിരാപുരം സ്വദേശികളായ പ്രദീപ്, അദ്ദേഹത്തിന്റെ 29 വയസ്സുള്ള ഭാര്യ മാണി പവാർ എന്നിവർ ഥാറിന്റെ ഡെലിവറി എടുക്കാൻ നിർമാൺ വിഹാറിലെ മഹീന്ദ്ര ഷോറൂമിൽ എത്തിയപ്പോഴാണ് അപകടം സംഭവിച്ചത്.
ഒരു പരമ്പരാഗത ചടങ്ങിന്റെ ഭാഗമായി, മാണി ടയറുകൾക്കടിയിൽ നാരങ്ങ വെച്ച ശേഷം വാഹനം മുന്നോട്ട് എടുക്കാൻ ശ്രമിച്ചു. എന്നാൽ, അവർ ആക്സിലേറ്റർ അബദ്ധത്തിൽ അമർത്തിയതിനെ തുടർന്ന് വാഹനത്തിന്റെ നിയന്ത്രണം നഷ്ടപ്പെടുകയായിരുന്നു.
വാഹനം ഷോറൂമിന്റെ ചില്ല് ഭിത്തി തകർത്ത് ഒന്നാം നിലയിൽ നിന്ന് താഴേക്ക് റോഡിലേക്ക് പതിച്ചു. അപകടസമയത്ത് മാണി, ഭർത്താവ് പ്രദീപ്, ഷോറൂമിലെ സെയിൽസ്മാൻ വികാസ് എന്നിവർ വാഹനത്തിലുണ്ടായിരുന്നു. വാഹനം കൈകാര്യം ചെയ്യുന്നതിനെക്കുറിച്ച് വികാസ് മാണിക്ക് വിവരം നൽകുന്നതിനിടയിലാണ് അപകടം സംഭവിച്ചതെന്ന് പോലീസ് പറയുന്നു.
"തിങ്കളാഴ്ച വൈകുന്നേരം 6.08-ന് മാണി പവാറിന്റെ മെഡിക്കോ ലീഗൽ കേസ് (എംഎൽസി) നിർമാൺ വിഹാറിലെ മാലിക് ആശുപത്രിയിൽ നിന്ന് ലഭിച്ചു," ഡെപ്യൂട്ടി കമ്മീഷണർ ഓഫ് പോലീസ് (ഈസ്റ്റ്) അഭിഷേക് ധനിയ പറഞ്ഞു. "അന്വേഷണത്തിൽ, മാണിയും ഭർത്താവ് പ്രദീപും നിർമാൺ വിഹാറിലെ മഹീന്ദ്ര ഷോറൂമിൽ നിന്ന് ഒരു ഥാർ കാർ വാങ്ങിയതായി കണ്ടെത്തി. ഒന്നാം നിലയിൽ പാർക്ക് ചെയ്തിരുന്ന കാർ ഉടമക്ക് കൈമാറുന്നതിനിടെയാണ് നിയന്ത്രണം വിട്ട് ചില്ല് ഭിത്തി തകർത്ത് താഴേക്ക് പതിച്ചത്."
അപകടത്തിൽ ആർക്കും ഗുരുതരമായ പരിക്കേറ്റില്ലെന്ന് പോലീസ് പറഞ്ഞു. മാണിക്ക് പരിക്കേൽക്കുകയും ആശുപത്രിയിൽ പ്രവേശിപ്പിക്കുകയും ചെയ്തു. പക്ഷേ, സംഭവത്തിൽ മാണിയോ ഷോറൂം അധികൃതരോ ഇതുവരെ പരാതി നൽകിയിട്ടില്ല.
