കുടിയേറ്റ നയങ്ങൾ തിരഞ്ഞെടുപ്പിൽ പാർട്ടിക്ക് ഗുണവും ദോഷവും ചെയ്തതായി ട്രംപ് പറഞ്ഞു. 'എന്റെ നിലപാട് കുറച്ച് കടുത്തുപോയെന്നാണ് കരുതുന്നത്. പലരും ഇത് മികച്ച നടപടിയാണെന്ന് പറയും. എന്നാൽ ചിലർക്ക് ഇത് അതിരുകടന്ന നടപടിയാണെന്നാണ് അഭിപ്രായം' -ട്രംപ് പറഞ്ഞു.അമേരിക്ക-മെക്‌സിക്കോ അതിർത്തി അടച്ചതിൽ തനിക്ക് എ പ്ലസ് ഗ്രേഡ് ലഭിച്ചെന്നും കുറ്റവാളികളെ പുറത്താക്കിയ നടപടിക്ക് മികച്ച അംഗീകാരം ലഭിച്ചെന്നും ട്രംപ് അവകാശപ്പെട്ടു. എന്നാൽ, നാടുകടത്തൽ നടപടികൾ വർഷങ്ങളായി അമേരിക്കയിൽ താമസിക്കുകയും ജോലി ചെയ്യുകയും ചെയ്തിരുന്ന അനധികൃത കുടിയേറ്റക്കാരെയും ബാധിച്ചെന്ന് അദ്ദേഹം സമ്മതിച്ചു.'നല്ല ജോലികൾ ചെയ്‌തിരുന്നവരെയും ഞങ്ങൾ പുറത്താക്കി. അവർ ചെയ്ത നിയമലംഘനം നിയമവിരുദ്ധമായി രാജ്യത്തേക്ക് പ്രവേശിച്ചു എന്നത് മാത്രമായിരുന്നു.

പത്തുവർഷത്തിലേറെയായി അമേരിക്കയിൽ താമസിക്കുന്ന അനധികൃത കുടിയേറ്റക്കാരെ തിരിച്ചയക്കണമോ എന്ന കാര്യത്തിൽ രാജ്യത്ത് അഭിപ്രായവ്യത്യാസമുണ്ടെന്നും ട്രംപ് ചൂണ്ടിക്കാട്ടി. സ്ഥിരമായി ജോലി ചെയ്യുന്നവരും നികുതി അടയ്ക്കുന്നവരുമായ ആളുകളെ അമേരിക്കയിൽ തുടരാൻ അനുവദിക്കണമെന്നാണ് ഒരു വിഭാഗത്തിന്റെ നിലപാട്. ലാൻഡ്സ്കേപ്പിങ് കമ്പനികളിലും ഹോട്ടലുകളിലും മറ്റും ജോലി ചെയ്യുന്ന നല്ല ആളുകളെ പുറത്താക്കരുതെന്നാണ് ഇവരുടെ അഭിപ്രായം. എന്നാൽ, ഇവരെല്ലാം രാജ്യത്തുനിന്ന് പുറത്താക്കപ്പെടണമെന്നാണ് മറ്റൊരു വിഭാഗം കരുതുന്നതെന്നും ട്രംപ് പറഞ്ഞു.

വൈറ്റ് ഹൗസിലെ ഉദ്യോഗസ്ഥ മാറ്റത്തിനിടെയാണ് ട്രംപിന്റെ ഈ പ്രതികരണമെന്നതും ശ്രദ്ധേയമാണ്. ചീഫ് ഓഫ് സ്റ്റാഫ് സ്ഥാനത്തുനിന്ന് സൂസി വൈൽസിനെ മാറ്റി പകരം സ്റ്റീഫൻ മില്ലറെ കഴിഞ്ഞദിവസമാണ് ട്രംപ് നിയമിച്ചത്. ട്രംപ് ഭരണകൂടത്തിൻ്റെ കടുത്ത കുടിയേറ്റ നയങ്ങളുടെ പ്രധാന ശിൽപ്പികളിലൊരാളായാണ് മില്ലർ അറിയപ്പെടുന്നത്. മാർ-എ-ലാഗോയിൽ നടത്തിയ പ്രസംഗത്തിൽ മില്ലർ ട്രംപിനോടുള്ള വിശ്വസ്‌തത വീണ്ടും അടിവരയിട്ട് പ്രഖ്യാപിച്ചു. പ്രസിഡന്റിനോട് 'സമ്പൂർണ വിശ്വസ്‌തതയും പൂർണമായ സമർപ്പണവും' ഉണ്ടാകുമെന്നാണ് അദ്ദേഹം പറഞ്ഞത്.