ഗവിയിൽ പരിസ്ഥിതി മലിനീകരണം തടയുന്നതിന്റെ ഭാഗമായി നിയന്ത്രണങ്ങളേർപ്പെടുത്താൻ വനംവകുപ്പ്. ഗവിയിലേക്ക് ഡീസൽ, പെട്രോൾ വാഹനങ്ങൾക്ക് നിരോധനം ഏർപ്പെടുത്താനാണ് സർക്കാരിന്‍റെ നീക്കം. സന്ദർശകർക്കായി ചെക്ക്പോസ്റ്റുകളിൽ നിന്ന് തന്നെ വനം വകുപ്പിന്റെ ഇലക്ട്രിക് വാഹന സൗകര്യം ഏർപ്പെടുത്താനാണ് തീരുമാനമെന്ന് വനംവകുപ്പ് മന്ത്രി ഷിബു ബേബി ജോൺ പറഞ്ഞു.
ടൂറിസ്റ്റുകൾ വരുന്നതിനെ എതിർക്കുന്നില്ലെങ്കിലും സഞ്ചാരികളുടെ ഉത്തരവാദിത്തമില്ലാത്ത പെരുമാറ്റം അംഗീകരിക്കാൻ കഴിയില്ലെന്ന് മന്ത്രി വ്യക്തമാക്കി. ഇന്ത്യയിലെ ഏറ്റവും മികച്ച പ്രൊട്ടക്റ്റഡ് ഏരിയകളിലൊന്നായി ഗവിയെ നിലനിർത്തേണ്ടതുണ്ടെന്നും മന്ത്രി മീഡിയവണിനോട് പറഞ്ഞു. നിലവിൽ പ്രതിദിനം ചുരുക്കം ചില വാഹനങ്ങളാണ് (കെഎഫ്ഡിസി ടൂറിസ്റ്റ് വാഹനങ്ങൾ ഉൾപ്പെടെ) ഗവിയിലേക്ക് കടന്നുപോകുന്നത്. ഇവയ്ക്ക് പകരം ചെക്ക്പോസ്റ്റിൽ നിന്ന് ഇലക്ട്രിക് വാഹനങ്ങൾ ഏർപ്പെടുത്തും. പെരിയാർ ടൈഗർ റിസർവിലെ പോലെ സിഎൻജി വാഹനങ്ങൾ വിന്യസിക്കുന്നതും പരിഗണനയിലുണ്ട്.
ഗവിയിലേക്ക് സർവീസ് നടത്തുന്ന കെഎസ്ആർടിസി ബസുകളും ഇലക്ട്രിക് വാഹനങ്ങളാക്കി മാറ്റണമെന്ന നിർദ്ദേശം വനം വകുപ്പ് മുന്നോട്ടുവെച്ചിട്ടുണ്ട്. ഇത് സംബന്ധിച്ച് കെഎസ്ആർടിസി എംഡിയുമായി ആദ്യഘട്ട ചർച്ചകൾ പൂർത്തിയായി. അടുത്ത ആഴ്ച ഗതാഗത വകുപ്പ് മന്ത്രിയുമായി ചേർന്ന് അന്തിമ ചർച്ചകൾ നടത്തുമെന്നും മന്ത്രി അറിയിച്ചു.വനം മേഖലയിൽ ഇതിനോടകം പ്ലാസ്റ്റിക് നിരോധനം കർശനമാക്കിയിട്ടുണ്ട്. ഇതിന്റെ തുടർച്ചയായാണ് ഗവിയിലെ മലിനീകരണം പൂർണമായും ഒഴിവാക്കിക്കൊണ്ട് ഗ്രീൻ എനർജി വാഹനങ്ങളിലേക്ക് മാത്രം പ്രവേശനം ചുരുക്കാനുള്ള മാതൃകാപരമായ നീക്കങ്ങൾ വനം വകുപ്പ് നടപ്പിലാക്കുന്നത്.
