അതേസമയം, അമേരിക്കയിലേക്കുള്ള കയറ്റുമതി കുറഞ്ഞുവരുകയാണ്. കയറ്റുമതിരംഗത്ത് അമേരിക്കയെ അമിതമായി ആശ്രയിക്കുന്നത് ഒഴിവാക്കുന്നതിനാണ് ഇന്ത്യയുടെ ശ്രമം. എന്നാൽ വസ്ത്രം, ആഭരണം, വിലയേറിയ കല്ലുകൾ, സമുദ്രോത്പന്നങ്ങൾ എന്നിങ്ങനെ തൊഴിൽകേന്ദ്രീകൃതമായ കയറ്റുമതിമേഖലകളിൽ ഈ മാറ്റം പ്രതിസന്ധി സൃഷ്ടിക്കുന്നുമുണ്ട്.

തീരുവയ്ക്കുമുൻപ് അമേരിക്കയിലേക്കുള്ള ഇന്ത്യൻ വാണിജ്യകയറ്റുമതി മൊത്തം കയറ്റുമതിയുടെ 22.5 ശതമാനം വരെയായിരുന്നു. ഇപ്പോഴിത് 17.8 ശതമാനമായി കുറഞ്ഞെന്നാണ് ഇളാര സെക്യൂരിറ്റീസിന്റെ വിശകലനറിപ്പോർട്ട് പറയുന്നത്. ചൈന, യുഎഇ, സ്‌പെയിൻ, ഹോങ്കോങ് പോലുള്ള വിപണികളിലേക്ക് കയറ്റുമതി ഉയർത്തിക്കൊണ്ടാണ് ഇന്ത്യ ഇതിന്റെ ആഘാതം നേരിടുന്നത്. ജർമനി, ഇറ്റലി എന്നിവിടങ്ങളിലേക്ക് കയറ്റുമതി ഉയർന്നുതുടങ്ങിയിട്ടുണ്ട്. അതേസമയം നെതർലൻഡ്‌സ്, യു.കെ. എന്നിവിടങ്ങളിലേക്ക് ഇടിവുണ്ടാവുകയും ചെയ്തു.