മസ്കുലർ സ്ട്രീറ്റ്ഫൈറ്റർ ഡിസൈൻ രീതിയിലാണ് രണ്ട് മോട്ടോർസൈക്കിളുകളും നിർമിച്ചിരിക്കുന്നത്. ഷാർപ്പായ ബോഡി ഡിസൈൻ, പൂർണ എൽഇഡി ലൈറ്റിങ്ങ് എന്നിവ ഇതിൻ്റെ സവിശേഷതയാണ്. മാറ്റ് പേൾ ഫ്ലെയർ വൈറ്റ്, മാറ്റ് ബാലിസ്റ്റിക് ബ്ലാക്ക് മെറ്റാലിക് എന്നീ നിറങ്ങളിൽ സിബി750 ഹോർനെറ്റ് ലഭ്യമാണ്. അതേസമയം, ഗോൾഡ് ആക്സന്റുകളുള്ള മാറ്റ് ബാലിസ്റ്റിക് ബ്ലാക്ക് മെറ്റാലിക്ക് നിറത്തിലാണ് സിബി 1000 ഹോർനെറ്റ് എസ്പ‌ി സ്വന്തമാക്കാനാവുക.

755 സിസി ഇൻലൈൻ 2-സിലിണ്ടർ എൻജിനാണ് സിബി 750 ഹോർനെറ്റിന്റെ ഹൃദയം. ഇത് 91.7 ബിഎച്ച്‌പി കരുത്തും 75 എൻഎം ടോർക്കും ഉത്പാദിപ്പിക്കുന്നു. 999 സിസി ഇൻലൈൻ ഫോർ-സിലിണ്ടർ എൻജിനാണ് സിബി1000 ഹോർനെറ്റ് എസ്പിക്കുള്ളത്. ഇത് 157 ബിഎച്ച്പി കരുത്തും 107 എൻഎം ടോർക്കും പുറപ്പെടുവിക്കും. രണ്ട് മോഡലുകളിലും അസിസ്റ്റ് ആൻഡ് സ്ലിപ്പർ ക്ലച്ച് ഉള്ള 6-സ്പീഡ് ഗിയർബോക്‌സാണ് ഘടിപ്പിച്ചിരിക്കുന്നത്. സ്പോർട്ട്, സ്റ്റാൻഡേർഡ്, റെയിൻ, യൂസർ എന്നിങ്ങനെ നാല് റൈഡിങ്ങ് മോഡുകൾ സിബി 750 ഹോർനെറ്റിലുണ്ട്.

അതേസമയം സിബി1000 ഹോർനെറ്റ് എസ്പിക്ക് കസ്റ്റമൈസ് ചെയ്യാൻ കഴിയുന്ന അഞ്ചാമാതായൊരു മോഡും ഒരു ബൈ-ഡയറക്ഷണൽ ക്വിക്ക്ഷിഫ്റ്ററും കൂട്ടിച്ചേർത്തിരിക്കുന്നു.

സിബി750 ഹോർനെറ്റിൽ, ഷോവ എസ്എഫ്എഫ്-ബിപിടിഎം ഫ്രണ്ട് ഫോർക്കും പ്രോ-ലിങ്ക് സ്വിംങ്ങാമുള്ള റിയർ മോണോഷോക്കുമാണുള്ളത്. ഷോവ എസ്എഫ്എഫ്-ബിപി ഫ്രണ്ട് ഫോർക്കും ഓഹ്ലിൻസ് ടിടിഎക്‌സ് 36 റിയർ സസ്പെൻഷനുമാണ് സിബി1000 ഹോർനെറ്റ് എസ്പിയിൽ കമ്പനി നൽകിയിട്ടുള്ളത്. ഡ്യുവൽ ഫ്രണ്ട് ഡിസ്കു‌കൾ (സിബി750-ന് 296 എംഎം, സിബി1000-ന് 310 എംഎം), 240 എംഎം റിയർ ഡിസ്ക്, കൂടാതെ രണ്ടിലും ഡ്യുവൽ-ചാനൽ എബിഎസ് എന്നിവയാണ് ഇരു മോഡലുകളിലും ബ്രേക്കിങ്ങ് കാര്യക്ഷമമാക്കുന്നത്.

രണ്ടിലും അഞ്ച് ഇഞ്ച് ടിഎഫ്ടി ഡിസ്പ്ലേ ലഭിക്കുന്നു. ഇതിൽ ബ്ലൂടൂത്ത് വഴി നാവിഗേഷൻ, കോളുകൾ, മ്യൂസിക് നിയന്ത്രണം എന്നിവ സാധ്യാമാകും. ഇവ ഉപയോഗിക്കാൻ ഹോണ്ട റോഡ്‌സിങ്ക് ആപ്പ് കണക്റ്റിവിറ്റിയോടൊപ്പം മൾട്ടി-ഫങ്ഷണൽ സ്വിച്ചും കമ്പനി വാഗ്ദാനം ചെയ്യുന്നു. ഹോണ്ട സെലക്റ്റബിൾ ടോർക്ക് കൺട്രോൾ, എമർജൻസി സ്റ്റോപ്പ് സിഗ്നൽ എന്നിവയും ഉണ്ട്.